Breaking News :
Police Tollfree
Home » News » Dikgang » Lekawana le bolaile mokapelo

Lekawana le bolaile mokapelo

Mapodisi a Letlhakeng a tlhotlhomisa tiragalo e mo go yone lekawana la dingwaga tse masome a mabedi le bongwe le bolaileng mosetsana wa dingwaga tse lesome le borobabobedi kwa Ditshegwane.

Mogolwane wa mapodisi a Letlhakeng, Superintendent Mogomotsi Kesupile, a re ka Tlhakole e le lesome le borobabongwe, lekawana leo le ne la latela mosetsana yoo kwa ga bone kwa a fetileng a kopa gore a mmuledise ba ye go buisanya.

Rre Kesupile o tlhalositse fa mmaagwe mosetsana a ne a kgalemela ngwana wa gagwe gore a seka a tsamaya le rre yoo ka ba santse ba na le kgang kwa kgotleng ya ditsheko, mme ka bofefo lekawana leo la ntsha sengwe se se bogale a tsatsanka mokapelo wa gagwe a bo a inaya naga.

Le fa go ntse jalo, mapodisi a ne a kgona go tshwara mmelaelwa.

Mogolwane o supile fa mosadi yoo a ne a ragosediwa kwa kokelong ya Scottish Livingstone kwa Molepolole kwa a neng a tlhokafala letsatsi le le latelang.

Supt Kesupile o supile fa mmelaelwa a ne a letetse tsheko kwa ntle ka molato wa go tshosetsa mosetsana yo a mmolaileng.

O tlhalositse fa rre yoo a ne a itshupile fa pele ga lekgotla ka Mosupologo, a tlhalosa fa a tlholega kwa Moshaweng fa moswi a tlholega kwa Kgare.

Supt Kesupile o kopile batsadi gore ba seka ba agisanya bana fa dikgang tsa bone di setse di le kwa kgotleng ya ditsheko a bo a kopa beng ba dikgang go tlogela mowa wa go di tsholola. BOKHUTLO

Source : BOPA

Author : Puseletso Kenyaditswe

Location : DITSHEGWANE

Event : Potsolotso

Date : Feb 23 Tue,2021

Networks

Social Network