Breaking News :
Police GBV
Home » News » Dikgang » Monana o kopile bomme go e la tlhoko mafoko a bone

Monana o kopile bomme go e la tlhoko mafoko a bone

Moeteledipele wa mokgatlho wa banana oo  lwantshang kgokgontsho ya bong kwa Serowe le metse e e mo tikologong, Mme Ati Dintwa, o kgadile bomme bangwe ba a reng ga ba tlhophele bakapelo ba bone mafoko mo go felelang go baka diphapang le ntwa.

O buile se kwa thutopuisanong bosheng.  

A re go sa tlhophele borre mafoko ke nngwe ya tse di bakang kgokgontsho ka borre ba le pelo khutshwane.

Mme Dintwa o boletse fa nako e nngwe molelo o kuketswa ke bomme ka go bua mafoko aa kgopisang.

A re mafoko a a tshwanang le bo ‘sekopa ke wena’, ‘ntsa ke wena’ le ‘poo ke wena’ a kgopisa borre thata.

Mookamedi wa mokgatlho a re bomme ga ba sa rate go tlhakanela dikobo ka nako eo ba gana fela le fa rre a kopa ka botho.

A re bomme bangwe ba matlho matlho fa bangwe ba ilwe ke madi tlhogong.

Mongwe wa batsena thutopuisano eo, okhanselara wa Tidimalo kwa Serowe, Rre Solomon Dikgang, o boletse fa kgokgontsho e le ntsi thata mo bananeng ka gore bontsi ga ba bereke.

O boletse fa mo dikhirong go santse gotwe go batliwa motho oo nang le botsipa a sa bolo go bereka ka lebaka a re sone seo ke kgokgontsho mo bananeng ba ba batlang go ithuta ditiro.

Mokhanselara Dikgang o boletse fa banana ba sokola go bona ditsha mme seo se kgokgontsha maikutlo a bone.  

A re gompieno maloko a kabo-ditsha go tlhophilwe bagolo fela ba ba tlogetseng ditiro ka bogodi, boemong ja gore go tsenngwe banana ka ba le maoto a bofefo.

Mokhanselara o boletse fa dikgwebo tsa banana ba ba neng ba thusitswe di ole ka tse dingwe ba tsene mo go tsone ba sena keletso e bile ba tlhokile bogakolodi.

Rre Dikgang o ne a bolela fa dikgang tsa kgokgontsho bogolo jang ya thubetso di tshwanetse go sekwa ka bonako. Bokhutlo

Source : BOPA

Author : Tshiamiso Mosetlha

Location : Serowe

Event : Thuto Puisanyo

Date : Oct 25 Sun,2020

Networks

Social Network