Breast Cancer month
Breaking News :
Police GBV
Home » News » Dikgang » Balemi ba ba ikopantseng ba thobo ntsi

Balemi ba ba ikopantseng ba thobo ntsi

Go ya ka ditshetsheko tse di setseng di dirilwe, balemi ba ba ikopantseng ba na le bokgoni jwa go ntsha thobo e ntsi go na le ba ba ikemetseng ka bonosi.

Se se builwe ke mookamedi wa lekalana la Botswana Agricultural Marketing Board (BAMB) Rre Leonard Morakaladi kwa phuthegong e e neng e rulagantswe ke mothusa tona wa Papadi le Madirelo Rre Molebatsi Molebatsi kwa Mogapinyana.

O ne a supa fa mo nakong e e fetileng kgaolo ya Tswapong e ne e le yone e e itsegang ka go ntsha dijo, a re se se makatsang ke gore ka nako eo, go ne go sena mananeo. 

A re nako e gorogile ya gore Batswana ba tsee temo jaaka kgwebo, a ba rotloetsa go tsaya malebela ka balemi ba Pandamatenga ba mo nakong ya gompieno ba dirang bontle.

Rre Morakaladi o ne a supa fa madi a puso a wela mo motlhobodikeng ka go dirisiwa didikadike go agelela masimo a e reng morago a fetoge marope. 

O ne a supa fa BAMB e ikemiseditse go ema balemi nokeng ka go reka thobo ya bone, mme go lebega balemi ba goga dinao go ntsha dijo tse di lekaneng.

O ne a rotloetsa balemi go lema dijalo tsa lesika la dinawa, ditloo le manoko ka di supile di tlhokafala thata kwa mafatsheng a sele mme ba sa kgone se se batlegang.

E ntse e le kwa phuthegong eo, mmabalemisi wa Legare, Mme Keakabetse Phalaagae o supile fa Mogapinyana Cluster Fencing e e itsegang ka leina la Leota, e na le maloko a le 380 le tshimo ya diekere tse 7 162 e e saleng e ageletswe ka 2010.

Mme Phalaagae o ne a supa fa mo diekereng tseo go lengwa fela di le 2 380, a re se se supa go tlhoka tlhoafalo ga balemi.

O ne a supa fa ba kgonne go epa didiba di le pedi mme ka go tlhoka lesego se sengwe se supile fa metsi a sone a le mannye fa se sengwe se na le metsi a balemi ba ka a dirisang go nosetsa.

Modulasetilo wa komiti ya Leota la Mogapinyana,  Rre Moses Medupe o supile fa Leota le akaretsa dikgaolwana di le tlhano e leng ya Ramasimo, Sekwenane, Mabarolwa, Rakgokwana le ya Gii.

A re morago ga kagelelo ya Leota, jaanong batho bangwe ba hudisetsa leruo mo teng.

O ne a supa fa bontlha bongwe jwa Leota bo na le dibata tse di sekakeng tsa lemega.

Rre Medupe o ne a kopa mothusa tona go ba kopanya le ba lephata la bojanala go sekaseka gore a ba ka sekae ba dirisa lefelo leo go nna le bojanala ka e bile le na le ditso tse di supang fa batho ba kile ba nna koo.

Rre Molebatsi yo e bileng e le mopalamente wa Mmadinare, o ne a supa fa a solofela fa temo e tlaa fetoga ka balemi ba anyile go le gontsi mo bagolwaneng ba maphata ka go farologana.

Morago ga phuthego mothusa tona o ne a ya go lekola kagelelo ya masimo kwa Mogapinyana. BOKHUTLO

Source : BOPA

Author : Gaboselwe Olesitse

Location : MOGAPINYANA

Event : phuthego

Date : Oct 18 Sun,2020

Networks

Social Network