Breast Cancer month
Breaking News :
Police GBV
Home » News » Dikgang » Thekiso ya lefatshe e tshwenya Makwinja

Thekiso ya lefatshe e tshwenya Makwinja

Mopalamente wa Mmopane-Lentsweletau, Mme Nnaniki Makwinja, a re o tshwenngwa ke seemo se se golelang pele sa thekiso ya lefatshe kwa Kopong, selo se a reng se kgathanong.

Mopalamente, yo a neng a kopanye le boeteledipele jwa motse ka Labobedi, o tlhagisitse morafe go nna kelotlhoko mo dikgannyeng tsa go amogwa lefatshe, a re seo seka digela tlase itsholelo ya bone.

“A re itiseng mo go ba ba gabileng go itlhabolola ka di tsarona. Re lebile dipoelo tsa nakwana tse di ka se re iseng gope, re file batho boswa jwa se nnela ruri,” ga gakolola Mme Makwinja.

A re batho ba lebile kgaolo eo ka go e meletsa mathe ka ntlha ya gore e gaufi le toropo kgolo Gaborone, ka jalo fa morafe o sa ikele tlhoko, ba ya go sala mo lehumeng batho bone ba palameletse ka ditsa bone.

Mo go tse dingwe, Mme Makwinja, yo gape e leng Mothusa Tona wa Lephata la Thuto go tswa kwa Moding, o tlhalositse fa lenaneo la Ipelegeng le santse le le teng le ntswa le dirwa ka tsela e e tokafaditsweng.

Kgosi ya Kopong, Rre Michael Molefhe, a re o tshwennngwa thata ke seemo se se sa iketlang sa dikgang tsa borukutlhi.

A re dikgang tse mo go tsone batho ba tsenelelwang mo malwapeng le go utswelwa dithoto, go atile thata kwa Kopong mme matshwenyego ke gore ga go ope yoo tshwarwang.

 “Pelaelo ke gore dikgang tseo di dirwa ke bana mo gae ka jaana e le bone ba itseng gore go na le mang, kae le ka nako efe,” ga tlhalosa Kgosi Molefhe

Kgosi wa Sasakwe, Rre Thibakgoro Phadimapa, a re o tlhobaediwa ke tiego ya go rarabolola dikgang tsa peo ya ditsha mo a tlhalosang go rotloetsa bothata jwa bo maipaafela.

“A re tsibogeleng seemo sa go fefosa peo ya ditsha ka jaana go tlhatlagana mo malwepeng ga batsadi le bana go ntsha seemo mo taolong,” ga gakolola Kgosi Phadimapa.

Mogolwane wa mapodisi, Assistant Superintendent Michael Mosothwane, le ene o ne a tlhomamisa fa Kopong a faraferwe ke dikgang tse di golang tsa seemo sa borukutlhi.

ASP Mosothwane o kgothaditse morafe go ema ka dinao go upolola masula ao, a a supang fa go le gantsi a dirwa ke batho ba ba tswang kwantle ka tshwaragano le beng gae. Bokhutlo

Source : BOPA

Author : Kebaeditse Baitlotli

Location : Kopong

Event : Bokopano

Date : Oct 15 Thu,2020

Networks

Social Network