Breaking News :
Police GBV
Home » News » Dikgang » Mapodisi kwa Middlepitsa a tlhotlhomisa kotsi

Mapodisi kwa Middlepitsa a tlhotlhomisa kotsi

Mapodisi a Middlepits a tlhotlhomisa tiragalo e mo go yone mokhanselara wa Khawa, Rre Piet Bock, le bangwe ba le lesome ba bonyeng dikgobalo morago ga gore koloi e ba neng ba tsamaya ka yone e pitikologe gaufi le Kolonkwaneng ka Labotlhano.

Motshwarelela mookamela mapodisi a Middlepits, Sub Inspector Kefentse Maibi a re botlhe ba ba amegileng ba ne ba ragosediwa kwa kokelong ya Tsabong ka dikgobalo tse di masisi mme ba fetisediwa kwa Gaborone.

 “Ba le babedi ba robaditswe kwa Bokamoso Private Hospital, ba le bararo ba kwa Sidilega, ba le bararo kwa Gaborone Private Hospital fa ba le babedi ba le kwa Princess Marina.  Bontsi jwa bone ba gobetse mo ditlhogong fa ngwana ene a robegile,” ga tlhalosa Sub Insp Maibi. 

A re se se nametsang ke gore botlhe ba a sidilega. Sub Insp. Maibi a re ba belaela gore koloi eo ya modiro wa Toyota Hilux e ne e tsamaya ka lebelo le le kwa godimo mme mokgweetsi a latlhegelwa ke taolo.

A re kotsi e diragaletse fa tsela e nang le borogo teng, mme mo nakong eno, go dirisiwa mola o le mongwe ka gore mola wa dikoloi tse di tswang ntlheng ya Tsabong o santse o tswetswe ka ntata ya dipaakanyo. 

A re fa dikoloi di tsena mo lefelong leo di tshwanelwa ke go ema gore di refosane.

“Dipelaelo ke gore mo maitekong a go leka go hema go thulana le teraka ee neng e tswa ntlheng e nngwe ya tsela, mokgweetsi o ne a latlhegelwa ke taolo, ka jalo koloi ya menoga,” ga tlhalosa Sub Insp Maibi.

O ne a gakolola bakgweetsi go ela thoko fa ba tsena mo lefelong leo ka go le borai fela thata.  

A re tsela eo e gobeya diphologolo tsa naga le leruo, ka jalo bakgweetsi ba tshwanetse go tsamaya ka lebelo le le letlelesegang ba bo ba ela tlhoko dikgoreletsi le gone go obamela matshwao a tsela ka nako tsotlhe. BOKHUTLO

Source : BOPA

Author : Calviniah Kgautlhe

Location : TSABONG

Event : Potsolotso

Date : Sep 15 Tue,2020

Networks

Social Network