Breaking News :
Police GBV
Home » News » Dikgang » Lephata la bong le kgala kgokgontsho

Lephata la bong le kgala kgokgontsho

Mogolwane wa lephata la merero ya bong kwa Maun, Mme Boitumelo Likuni, a re ba tshwenngwa ke go golela pele ga dikgang tsa kgokgontsho. 

O boletse fa ba lemogile  koketsego ya dikgang tsa kgokgontso jaaka go thubediwa ga bomme le bana ba basetsana. 

O buile se kwa tshimolodisong ya kgwedi ya thapelo kgatlhanong le HIV/AIDS le COVID-19 bosheng. 

Mme Likuni a re se sengomolang pelo ke gore go na le kgonagalo ya gore ba ba amegileng ba ka tsenwa ke mogare wa HIV. 

O boletse fa borre bangwe le basimane le bone ba amilwe ke kgokgontsho e. 

A re pego ya bone ya botsogo e supile fa go simolola ka kgwedi ya Moranang go fitlha Seetebosigo, go boletswe dikgang di le 122 tsa boimana jwa bana ba ba dingwaga tse di kwa tlase, mme kwa mapodising go kwadisitswe di le masome a mabedi le botlhano fela go simolola ka Hirikgong go fitlha ka Phukwi. 

A re seo se supa gore sengwe ga se dirwe sentle, ka jaana batsadi ba sa bege dikgang tsa thubetso ya bana. 

Mme Likuni o kgadile a sa kgwe mathe batsadi ba ba santseng ba bipa dikgang tseo, a re ga gona jaaka kgokgontsho e ka fela fa ba sa e bege. 

Fa a itebaganya le go betelelwa ga bomme, o boletse fa mapodisi a kwadisitse dikgang di le masome a mararo le bongwe go simolola ka Hirikgong go fitlha ka Phukwi. 

A re ba lemogile gape fa bomme le bone ba tshabelelwa ke kgokgontsho jaaka dikiteyo le gone go thubediwa, mme ba ngosela go bega dikgang tsa teng. 

O ne a lebogela dikereke go rapelela diemo tse di sa iketlang tsa malwetse le yone kgokgontsho ya bong. 

A re diemo tseo di kgona go tsenya motho maikutlo a a tobekaneng, mme a gwetlha dikereke go tswelela ka go gasa molaetsa wa tsholofelo, a tlatsa ka gore ga go sepe se se ka palelang Modimo. 

Motshwarelela kgosi ya Batawana, Mme Kealetile Moremi, ene o ne a gwetlha morafe go tsaya tsiya dikgakololo tsa puso le makalana a a ikemetseng, a supa fa HIV/AIDS le COVID-19 di dira matshosetsi mo matshelong a batho. 

A re malwetse ao a borai ka jaana a kokonela le yone itsholelo ya mafatshe, mme a lopa tswaragano go a lwantsha ka go obamela melawana ya botsogo. 

Kgosi Moremi a re ba tshwenngwa ke batho bangwe ba ba tsweletseng ka go kgobokana le ntswa melao ya COVID-19 e kgalo seo. 

O supile fa bangwe ba tlala mo mafelong a a bdidwang ‘beaches’ mme a ikuela mo batsading go kgalemela bana ba bone ka jaana go dira jalo go ka dira gore bolwetse bo gasame motlhofo. 

Kgosi o kopile banwi ba bojalwa go reka ba bo ba ya go nwela kwa malwapeng. 

Moeteledipele wa lekgotla la baruti, Apostle Terrence Sechele o ne a kopa morafe go tsaya boikarabelo ka matshelo a bone. 

A re go sala ditaelo tsa ba botsgo morago ga go reye motho ga a na tumelo. 

O supile gape fa bangwe ba nna le boitlhobogo ka botshelo, bogolo jang fa ba amilwe ke malwetse kana dikgwetlho jaaka kgokgontsho ya bomme, mme a ba gwetlha go tsepamisa matlho a bone mo Modimong fa ba le mo diemong tse di thata. 

Moruti Tshepiso Robert go tswa kwa BOCAIP o ne a tlhalosa fa go le botlhokwa go simolodisa kgwedi ya thapelo kgatlhanong le HIV/AIDS le COVID-19 le kgokgontsho ya bong, a supa fa seo se tlaa ba fa nako ya go itsaya ka motlhala go bona gore ba dirile go le kae go lwantsha malwetse ao. 

A re dikgang tsa kgokgontso di tsere phekelo e sele ka jalo di batla gore setshaba se di emela ka dinao ka go nna gaufi le Modimo. 

Moruti Robert a re go maleba gore dikereke di oketse maiteko a tsone mo go lwantsheng dikgwetlho tse di aparetseng lefatshe leno. BOKHUTLO

Source : BOPA

Author : Esther Mmolai

Location : MAUN

Event : Tshimolodiso ya kgwedi ya thapelo

Date : Sep 15 Tue,2020

Networks

Social Network