Breaking News :
Police GBV
Home » News » Dikgang » Dr Tshipayagae o rotloetsa go ikgapha ko gae

Dr Tshipayagae o rotloetsa go ikgapha ko gae

Mookamedi wa lephata la ditirelo tsa botsogo, Dr Malaki Tshipayagae, o rotloeditse Batswana go itlwaetsa go nna kwa malwapeng go fokotsa kanamo ya segajaja sa COVID-19.

Fa a rolela setshaba pego ka Mosupologo, Dr Tshipayagae o boletse fa bolwetse bo tsweletse ka go kekela, mme a rotloetsa ba ba amegang go iphapha, a tlatsa ka gore le bone ba ba nang le mogare, ba rotloediwa go nna mo tlhokomelong ya kwa malwapeng, go itsa mosuke kwa kokelong.

Dr Tshipayagae a re bontsi jwa batho ba ba nang le mogare wa corona ga ba supe dikai. Se se dira gore tlhokomelo kwa malwapeng e nne motlhofo. 

O ne a tlhalosa fa batho ba robabobedi mo lekgolong ba sena go supa dikai tsa COVID-19, mme masome a matlhano mo lekgolong ba ka nna le dikai fela mme ba sa lwale, fa botlhano mo lekgolong ba ka felela ba gateletswe.

Le fa go ntse jalo, a re ba lemogile gore batho ba ba tlhokomelelwang kwa malwapeng ga ba sale ditaelo morago, mme se se feleletsa se oketsa kanamo ya mogare. 

A re ba botsogo ba tlaa gatelela tiriso ya maseka, go latedisa ba ba sa obameleng melawana ya go fokotsa kanamo ya mogare.

Dr Tshipayagae o ne a gakolola setshaba go tsaa boikarabelo, a tlatsa ka gore mongwe le mongwe o lebanwe ke ntwa e. 

O tlhalositse fa ba botsogo ba tshwere phage ka mangana, mme setshaba se ka thusa go ba fokoletsa mokgweleo ka go itshireletsa.

A re fa e sa le ka kgwedi ya Lwetse e le malatsi a ferabongwe, go nnile le batho ba ba tshwerweng ka mogare wa corona ba le 211, mo go bone Batswana ba le 197, mme batswakwa ba le 14.

Dr Tshipayagae a re se, se oketsa dipalo tsa Batswana ba ba nang le mogare go ya kwa go 1 350. 

Batho ba le 764 ba ba nang le mogare ba santse ba tshegeditswe ke ba bongaka, ba le 575 ba botoka, fa ba ba tlhokafetseng ba le lesome le bongwe. BOKHUTLO

Source : BOPA

Author : Ketshepile More

Location : GABORONE

Event : Pego

Date : Sep 15 Tue,2020

Networks

Social Network