Breaking News :
Police GBV
Home » News » Dikgang » Dipetelelo le bogodu jwa diphologolo di ile magoletsa

Dipetelelo le bogodu jwa diphologolo di ile magoletsa

Mogolwane wa mapodisi a Letlhakane, Superintendent Michael Maphephu, a re ba tshwengwa ke dikgang tsa dipetelelo le bogodu jwa diphologolo  tse diileng magoletsa kwa Boteti.

O boletse mo potsolosong bosheng fa ba tlhotlhomisa dikgang di le pedi tsa petelelo le  tse pedi tsa bogodu jwa diphologolo.

A re e ne ya re ka Tshipi ba begelwa fa mosetsana wa dingwaga tse di lesome le botlhano kwa Letlhakane a ne a tsenelelwa ke monna mongwe mo ntlong bosigo a robetse.

Sup Maphephu a re ditlhotlhomiso di supa fa monna yoo a ne a  gogela mosetsana kwa sekgweng se se gaufi kwa a fetileng a itseela dikobo ka dikgoka.

A re mosetsana yoo a re o lekile go kuwa mme ga seka ga nna ope yo o neng a mo tswa mokgosi.

Mo kgannyeng e nngwe, Sup Maphephu a re ba tshegeditse monna wa dingwaga tse di masome a mabedi  mabapi le molato wa go tlhakanela dikobo le  mosetsana wa dingwaga tse di lesome le bone.

A re go begilwe fa batsadi ba mosetsana yoo ba ne ba fitlhela a seyo phakela fa ba tsoga, mme ya re fa a goroga a tlhalosa fa a robetse kwa mokapelong.

O tlhalositse fa ditlhotlhomiso di tsweletse mme mmelaelwa o ka nna a lebisiwa molato wa go tlhakanela dikobo le ngwana wa dingwaga tse di kwa tlase.

Mo dikgannyeng tsa bogodu jwa diphologolo, Sup Maphephu a re e rile ka Matlhatso kwa kgorong ya matlhoko a leruo ya Thalamabele  mapodisi phuruphutsa koloi nngwe  mme ba fitlhela nama e go belaesegang e le ya kukama.

A re ba ne ba tshegetsa monna wa dingwaga tse di masome a mararo le bosupa wa meraka ya Tsootshaa tebang le tiragalo eo..

Mo go e nngwe, Sup Maphephu o tlhalositse fa ba tshegeditse monna mongwe wa dingwaga tse di masome a mabedi le bone wa Letlhakane ka molato wa go bolaya sehudi.

A re monna yo o ne a bonwa a sikere sehudi ya re a bona mapodisi a  siya, mme ba mo leleka ba motshwara. BOKHUTLO

Source : BOPA

Author : Kefilwe Selotlegeng

Location : LETLHAKANE

Event : Potsolotso

Date : Jul 30 Thu,2020

Networks

Social Network