Breaking News :
Police GBV
Home » News » Dikgang » Khansele e amogela dimpho

Khansele e amogela dimpho

Marekisetso a Choppies le mokgatlho wa Tsabotshelo ba abetse khansele potlana ya Kanye (KAA) dipone tsa letsatsi le melora.

Modulasetilo wa khansele potlana, Rre Simon Ramaphoi,  a re segajaja sa COVID-19 ke mamba yo a sa bonweng ka matlho, ka jalo ba ba abileng dimpho ba dirile tiro e tona thata.

A re dipone di tla a thusa baithuti ba go senang motlakase kwa gabone.

Mogolwane wa Choppies, Mme Katlego Gaborone, a re ba bone go le maleba go abela dikhansele dipone tsa marang a letsatsi ka jaana di tla a thusa bana ka nako ya kgaogo ya motlakase.

A re ba abetse khansele potlana e dipone di le 2 225 mme ka nako ya a buwa ba ne ba tshotse dipone di le lekgolo le masome a supa.

Tse dingwe di tla a tla kwa morago ka jaana di tlhoka teraka.

Modulasetilo wa Tsabotshelo Womens Club, Mme Bani Mogatwane, ene o ne a bolela fa mokgatlho wa bone o kwadisitswe ka fa molaong ka 2014.

A re mokgatlho o, oo itebagantseng le go thusana mo go tsa manyalo, dintsho le go somarela ngwao, o na le maloko a le masome a matlhano.

A re ba ne ba thulanya ditlhogo go bona gore ba ka tseya lebogo jang mo go lwantsheng COVID-19 mme ba itlhophela go reka melora, ka molora o thusa thata mo bophepeng, a supa ba rekile melora e le 700.

Mme Mogatwane a re ba dirile se go tsibogela mokgosi wa ga Tautona Dr Mokgweetsi Masisi mabapi le COVID 19. BOKHUTLO

Source : BOPA

Author : Ikotlhaeng Rantopele

Location : KANYE

Event : KABO DIMPHO

Date : Jun 29 Mon,2020

Networks

Social Network