Breaking News :
Police GBV
Home » News » Dikgang » Y-Care e abela Mmatshumo le Mosu dijo

Y-Care e abela Mmatshumo le Mosu dijo

Mokgatlho wa Y-Care o abetse malwapa mangwe kwa Mmatshumo le Mosu dijo tse di lopileng P11 940.

Fa a bua kwa moletlong wa go aba dijo ka Matlhatso, modulasitilo wa mokgatlho wa Y Care, Rre Modise Koofethile, a re ba tswa kgakala ba thusa metse e mebedi eo ka ditsela tse di farologanyeng.

Rre Koofethile o tlhalositse fa ba ne ba bona go tshwanela gore ka bonyenyane jo ba nang le jone ba arabe kopo ya ga Tautona Dr Mokgweetsi Masisi go thusa puso mo maitlamong a go thusa ba ba amilweng ke manokonoko a COVID-19.

A re ba tlhophile metse eo ka gore ba direla moletlo wa bone wa mogwanto wa ngwaga le ngwaga kwa Makgadikgadi.

Rre Koofethile a re ba thusitse metse eo, segolo bogolo makgotlana a madi ka madi le tse dingwe tse ba di tlhokang.

O ne a ba kgothatsa go tswelela ka go ipabalela mo  segajajeng sa COVID-19 ka go obamela melawana ya botsogo.

Mothusa kgosi wa Mosu, Kgosi Phillip Kopano, o ne a lebogela Y-Care go tswelela ka go thusa motse wa gagwe fa e sale ngwaga wa 2006.

Kgosi Kopano a re mokgatlho oo o tsweletse ka go ba ema nokeng ka dithuso ka go farologana di akaretsa dikhomputara, printer le fax kwa diofising tsa kgotla.

Modulasetilo wa komiti ya ditlhabololo tsa Mmatshumo, Rre Batlhalefhi Gobuamang, le ene o ne a akgolela mokgatlho wa Y-Care go bo o tswa kgakala o dira tiro e ntle. Rre Gobuamang a re dimpho tse di abetsweng malwapa mangwe di ya go dira pharologanyo mo matshelong a bone.

Mongwe wa ba ba abetsweng dijo, Rre Nthaeletsang Bothatha, wa Mmatshumo le ene fela jalo o ne a lebogela mokgatlho go abela ba ba tlhokileng lesego.

Rre Bothata o ne a ba rotloetsa gore ba tswelele ka mowa wa bopelotlhomogi wa go thusa ba ba tlhaelang.

Mokhanselara wa kgaolo ya Mosu, Rre Mabona Makuane, o ne a leboga mokgatlho oo a kaya fa o dira tiro e tona.

Rre Makuane o ne a tlhalosa fa ba ba abetseeng dijo ba le sego ka jaana seo se tlaa fetola seemo sa malwapa a bone. BOKHUTLO

Source : BOPA

Author : Kefilwe Selotlegeng

Location : MMATSHUMO

Event : moletlo wa kabo dijo

Date : Jun 29 Mon,2020

Networks

Social Network