Breaking News :
Toll Free
Home » News » Dikgang » Bagwebi ba abela banni ba Khawa

Bagwebi ba abela banni ba Khawa

  • Click to see more pictures

Bagwebi bangwe kwa Kgalagadi ba abetse malwapa a le masome a mabedi dijo kwa Khawa ka letsatsi la Tshipi.

Moeteledipele wa marekisetso a Trans Africa kwa Tsabong, Rre Bhavesh Brahmbhatt, a re ba amogetse maina a le masome a mabedi go tswa kwa komiting ya motse ya ditlhabololo.

A re go botlhokwa go thusa puso mo go lwantsheng mogare wa corona o o tsentseng tsebe-tsebe lefatshe ka bophara.

Rre Brahmbhatt a re go botlhokwa go ema ka dinao go thusa mo ntweng ee tlhasetseng mafatshe.

A re go botlhokwa gore banni ba sale ditaelo tsa ba botsogo morago go itsa kanamo ya mogare mme bagwebi bone ba tlaa tswelelela ba thusa fa ba kgonang teng.

Fa a leboga bagwebi bao, mothusa kgosi wa Khawa, Kgosi David Manyoro, o ba akgoletse go aba dijo tseo. 

A re seo ke setho sa maemo a a kwa godimo se se tshwanetseng go opelwa legofi ka ga se batho ba bantsi ba ba ka kgonang go dira jalo .
  
Kgosi Manyoro a re fela jaaka batho botlhe mo Botswana, banni ba amilwe ke melao yotlhe e e direletsweng go thibela kanamo ya mogare oo ka jalo ba tlhoka go tlamelwa gore ba kgone go tshela. 
 
Moeteledipele wa komiti ya ditlhabololo, Mme Mmita Kelefhile, ene o phophothile bagwebi bao magetla gore ba bo ba thusitse ka nako a re go sego letsogo le le abang. 

A re puso e leka fela thata ka gore banni ba le masome a fera bongwe ba setse ba bone dijo. Bokhutlo

Source : BOPA

Author : Calviniah Kgautlhe

Location : Khawa

Event : Kabo dimpho

Date : May 18 Mon,2020

Networks

Social Network