32
Breaking News :
Home » News » Dikgang » Bomme ba diphuthego ba aba paka

Bomme ba diphuthego ba aba paka

Mokgatlho wa bomme ba diphuthego tsa dikereke kwa Mahalapye o abetse baithuti paka ya sekole ya mariga.

Modulasetilo wa komiti e e neng e rulagantse tiro e, Mme Agatha Madi a re maikaelelo a mokgatlho ke gore lentswe la bomme le utlwale mo dikgannyeng tsa tumelo le dikgwetlho tse di lebaneng setshaba.

A re le fa puso e thusa ka lenaneo la boipelego ga go a lekana, mme e tlhoka go thusiwa.

Mme Madi a re bomme ba bone go le botlhokwa go thusa go lwantsha mathata a a tshwenyang setshaba.

“Ke tiro ya bopelotlhomogi, re dira jaana ngwaga le ngwaga go supa lorato.

Mono ngwaga re bone go le botlhokwa go itebaganya le bana ba dikole tse dipotlana ba le masome mararo le borataro go ba rekela paka ya sekole e e feletseng go akarediwa le tse di tlaa thusang go ba sireletsa mo serameng ka e le paka ya mariga,”Mme Madi a tlhalosa.

Kgosi Duncan Segotsi o kaile fa a itumedisitswe ke se se dirilweng ke mokgatlho wa bomme.

A re go botlhokwa go bona ba gakologelwa ba ba tlhokang.

Kgosi Segotsi a re bana ba ba fiwang dimpho tse, ba tshwanetse gore ba gole ba itse botlhokwa jwa go thusa ba bangwe.

A re paka e, e tlaa thusa gore ba tie moko ba tsepame mo dithutong tsa bone.

“Go botlhokwa go bona maiteko a tsweletse go thusa puso,” kgosi a supa.

Mogolwane wa thuto wa kgaolong-potlana ya Mahalapye, Mme Neo Dikeme o lebogetse bomme bomolemo jwa tumelo ya Sekeresete.

Mme Dikeme a re go botlhokwa go thusana le go tlamela ba ba nang le letlhoko.

“Go a itumedisa go bona lo supegetsa bana lorato ka go ba abela dimpho,” Mme Dikeme a kaya, a re motlhalefi mongwe o kile a bua mafoko a a reng, ‘go tshela le Morena ke go tshela le batlhoki e bile go tshela le batlhoki ke go tshela le Morena’.

O tlhalositse fa bana ba ba tswang mo malwapeng a a nang le letlhoko ba kgona go kgoreletsega mo dithutong ka mabaka a go onalelwa e se gore ga ba a abelwa maboko jaaka ba bangwe.

Mme Dikeme a re botlhoki bo kgona gape go tsenya ngwana mowa wa borukutlhi. BOKHUTLO

Source : BOPA

Author : Mpho Maswikila

Location : MAHALAPYE

Event : Kabo dimpho

Date : May 26 Sun,2019

Networks

Social Network