11
Breaking News :
Home » News » Dikgang » Komiti ga e tsamaise Ipelegeng

Komiti ga e tsamaise Ipelegeng

Mopalamente wa Boteti Botlhaba, Rre Sethomo Lelatisitswe, a re komiti ya ditlhabololo tsa motse ga se ya Ipelegeng.

Mopalamente o buile se fa a buisa phuthego ya kgotla kwa kgotlaneng ya Sekwe kwa Letlhakane bosheng.

Tlhaloso e, e ne e gwetlhwa ke dingongorego tsa banni ka ditlhopho tsa komiti eo le khiro ya lenaneo la Ipelegeng.

Fa a ntsha pego ya komiti ya ditlhabololo, modulasetilo wa Letlhakane Botlhaba, Mme Matshediso Nyawe o boletse fa selelo segolo e le tlhaelo ya metsi le ditsela tse di sa siamang.

Mme Nyawe a re ba-na-le-bogolo ba a sokolaka go se na sekole kwa Letlhakane a tlatsa ka gore go santse gona le batsadi bangwe ba ba santseng ba ba fitlha. Mongwe wa banni ba kgotlana ya Sekwe, Mme Kgomotso Gabaitsikgosi, o ne a botsa gore tsamaiso ya phiro ya lenaneo la Ipelegeng e dirwa jang ka go tsaya  sebaka se se leele ba emetse go hirwa.

O ne gape a ngongorega gore komiti ga e tsene mo motseng, a supa fa go na le ba-na-le-bogole ba ba sa boneng ditlamelo.

Mme Gabaitsikgosi a re ba ne ba solofeditswe gore ba tlaa bewa ditsha mo diphatlheng tse di teng mo kgotlaneng ya bone mme ga se ka ga nna jalo.

Mopalamente o ne a ba lemotsha gore peo ya ditsha ga e dirwe ka gore motho o tlholega mo kgotleng e fe.

O ne a ba tlhalosetsa gore tiego ya kabo ditsha e bakilwe ke gore gone go santse go dirwa mealo mme lephata la kabo ditsha le filwe gore ka kgwedi ya Phukwi, le bo le setse le ntshitse ditlankana tsa disha.

O tlhalositse fa go na le ditsela dingwe tse di tlaa baakanngwang kwa kgaolong eo mo ngwageng o wa madi.

Rre Lelatisitswe o ne a lekodisa banni ka molao wa go oketsa dikotlhao tsa badira melato ba bogodu jwa leruo, molao wa go boela morago tiriso ya motshine wa ditlhopho le molao wa go oketsa dingwaga tsa pereko tsa babereki ba lephata la dikgolegelo.

E ne erile a amogela mopalamente, kgosi wa kgotlana ya Sekwe, Rre Makuke Makuke a leboga mopalamente go bo a ba lekola ka nako tsotlhe.

Kgosi Makuke o supile fa matshwenyego magolo a bone e le ditsela tse di sa siamang a re fa dipula di nele gone ke selelo le khuranyo ya meno.

O ne gape a re ba tshwenngwa ke tlhaelo ya metsi. BOKHUTLO

Source : BOPA

Author : Kefilwe Selotlegeng

Location : LETLHAKANE

Event : Phuthego ya Kgotla

Date : May 15 Wed,2019

Networks

Social Network