11
Breaking News :
Home » News » Dikgang » Banni ba Rakops ba neela Tatolo setilo sa boemela kgosi

Banni ba Rakops ba neela Tatolo setilo sa boemela kgosi

Banni ba Rakops kwa kgaolong ya Legare ba tlhophile Rre Seane Tatolo go tsaya setilo sa moemela bogosi.

Ba dirile jalo mo phuthegong ya kgotla kwa Rakops bosheng.

Phuthego eo, e ne e tshwanetse go tlhopha kgosana mme go ne ga seka ga diragala ka banni ba ne ba sa dumalana ka leina.

Morago ga go tlhophiwa, Rre Tatolo o ne a bolela fa a amogela thomo ya morafe.

E rile a ntsha la gagwe, Kgosi Serogola Seretse go tswa Serowe o ne a kopa morafe go tshwaragana le kgosi ya bone, a gatelela gore ba ratane le go tshela ka mowa o montle.

E ne e rile go le pele, Kgosi Seretse a kopa banni ba Rakops go tlhopha motho yo o tlaa direlang bogosi ka boineelo le boikarabelo.

A re kgosi e tshwanetse go  nna motho yo go ka tshabelwang kwa go ene, e seng yo o phatlalatsang morafe, a tlatsa ka gore “bore jo bo na le moila, Modimo ke e ne a tlhomileng bogosi, bo a tsalelwa.”

Fa a akgela Kgosi Nguvauva Nguvauva II wa Toromoja o ne a kopa banni ba Rakops go nna bana ba motho, a ba gakolola go tsaya tiro ya go tlhopha kgosi ka bonokopila.

Kgosi Nguvauva a re bogosi ke namane e tona ya tiro, a supa fa e se letsoku, bo sa tlodiwe. O ne a ba kopa go sala tsamaiso ya bogosi morago.

Rre Gaboitatolwe Jenjele ene o ne a kopa gore mo nakong ee tlang, ba fiwe ditsetlana tse ba tlaa di salang morago fa ba tlhopha dikgosi.

Rre Jenjele o ne a tlhalosa fa morafe o sa kgona go tlhopha kgosana ka lebaka la dikgang tsa semorafe.

O ne a supa fa Rre Tatolo, yo ba mo tlhophileng, a lebanwe ke setilo sa moemela bogosi ka a na le tebelopele le maikarabelo.

Rre Gaiseitswe Stofane ene o ne a tlhalosa fa ba tlhophile Rre Tatolo ba lebile bokgoni jwa gagwe le kitso e a nang nayo ya tsa semolao. BOKHUTLO

 

Source : BOPA

Author : Thandy Tebogo

Location : RAKOPS

Event : Phuthego ya Kgotla

Date : Mar 14 Thu,2019

Networks

Social Network