11
Breaking News :
Home » News » Dikgang » Baagi ba motse wa Salajwe ba emela borukutlhi ka dinao

Baagi ba motse wa Salajwe ba emela borukutlhi ka dinao

Modulasitilo wa komiti ya twantsho borukutlhi kwa Salajwe, Rre Dichaba Botlhoko, a re komiti eo e tsweletse sentle ka go lwantsha borukutlhi.

E rile a bua mo potsolotsong bosheng, Rre Botlhoko a re ba tshwaragane le morafe mo letsholong la go lwantsha borukutlhi.

A re banni ga ba ipone tsapa go tlhaba mokgosi fa gona le dikgotlhang dingwe kana ba utlwaletse borukutlhi bongwe.

A re se, se ba thusa go ya go lekola seemo bosupi bo santse bole teng.

Rre Botlhoko a re komiti eo e na le baithaopi ba le lesome le boferabongwe ba ba thusang mapodisi.

O tlhalositse gore morago ga go lemoga fa mo dingwagng tse di fetileng gone go na na le melato e mmalwa ya dipetelelo, dintwa le dipolaano ba ne ba ikgaoganya ka ditlhophana go baya seemo leitlho nako tsotlhe.

A re morago ga beke nngwe le nngwe ba kopana le magosana go ba rolela pego.

“Borukutlhi jo re lemogileng bo le bontsi mo nakong eno ke jwa dintwa kwa marekisetsong a bojalwa le ditlhapa”, a tlhalosa.

O tlhalositse gore kgotla ya Kgaleng ke yone ee nang le dikgang tse di kwa godimo tsa borukutlhi segolo jang ka ena le malwapa a le mmalwa aa rekisang majalwa a itirelwang.

A re ba lemogile fa banwi ba majalwa ao ba tlhoka tsebe mme ba felele ba bakile dintwa tse di kabong di sa diragala fa ba kgalemelwa ke ba bangwe.

Le fa gontse jalo, Rre Botlhoko a re o tshwenngwa ke seemo se banni bangwe ba kgokgontshiwang ka gore ga ba tlholege kwa motseng oo.

A re Motswana mongwe le mongwe o na le tshwanelo ya go nna gongwe le gongwe kwa a batlang teng go sa kgathelesege gore a ke motse oa tlholegang kwa go one kana jang.

Mogolwane wa sepodise wa kgaolo ya Takatokwane Superintendent Ocean Maranyane a re ba bonye mosola wa komiti ya twantsho borukutlhi ya Salajwe ka e tsweletse sentle ka go lwantsha borukutlhi.

A re o lebogela seabe sa banana ba ba ithaopileng go fetola seemo. A re dikomiti tsotlhe tsa kgaolo eo di a kopana morago ga kgwedi tse tharo go lekola tse ba dikgonneng.

Sup Maranyane a re le ntswa dipalo tsa borukutlhi di fokotsegile, tiro e santse e le ntsi.

Kgosi Moala Gaerupe o galaleditse morafe le mapodisi go dirisana sentle le komiti ya twantsho borukutlhi go fokotsa dikgang tsa borukutlhi kwa motseng oo.

A re tshwaragano eo, e tsisitse phetogo e kgolo mo motseng oo..

E re dikgang di eme jalo, Kgosi Gaerupe o kopile komiti eo go tswelela e dira ka natla morago ga gore e tsee maemo a ntlha kwa dikgaisanyong tsa kgaolo tsa mefuta ya go fema dikgwetlho tsa go lwantsha borukutlhi.

O tlhalositse gore seo se supa fa komiti eo e bereka ka natla mo eleng gore le kgaolo e lemoga seabe sa bone kwa motseng wa Salajwe.

A re seo gape se supa fa komiti eo e rata tiro ya bone ebile ba e tsaa tsia gammogo le go direla motse wa bone leina. BOKHUTLO

 

Source : BOPA

Author : Nthabiseng Modise

Location : SALAJWE

Event : Potsolotso

Date : Mar 14 Thu,2019

Networks

Social Network