Thursday Aug 16,2018
Breaking News :
Breast Exam
Home » News » Dikgang » Ratogomane o kopa thotoetso mo Batswaneng

Ratogomane o kopa thotoetso mo Batswaneng

E re ka jaana kgwebo e tlhoka bareki gore e kgone go tswelela le go itshetlela, mo go Rre Magogwe Ratogomane go pharologanyo ka jaana kgwebo ya gagwe e eme tsi!

Rre Ratogomane yo e leng motlhoka-pono o simolotse kgwebo ka 2017, a sena go bona dithuso ka lenaneo la nyeletso lehuma, e le dikete tse di lesome le botlhano tsa pula.

Kgwebo ya gagwe ke go loga ditilo a dirisa setlhare sa mokolwane ka bokgabane jo bo kwa godimo mme sebe sa phiri ke gore le ka seno sebaka ga a ise a kgone go bona le fa e le moreki a le mongwe.

“Ke loga ditilo tse ke dirisa setlhare sa mokolwane, ditilo di le nne ga mmogo le tafole ya tsone.

Ke loga fa go sena go thulwa ka ditshipi le go nosediwa ka monoso,” ga gatlhalosa Rre Ratogomane.

Ditilo tse Rre Ratogomane a di logang ga mmogo le tafole, o boletse fa di lopa sekete le makgolo a mabedi e le sentlwana.

O ne a tlhalosa gore fa e sale a simolola a kgonne go dira disete di le tharo mme tsotlhe ka boraro di ise di bone bareki.

“Kgwetlho e kgolo e ke nang le yone ke go thoka go rekwa ga ditilo tse.

Ke kopa thotoetso mo Batswaneng gore ba reke ditilo tse mme ke kgone go dira tse dingwe,” ga tlhalosa Rre Ratogomane .

Le ntswa Rre Ratogomane a loga jalo, ga se gone fela mo a go dirang.

O ne a bolela fa a baakanya ditilo tsa dipolaseteke mme le gone go le boutsana ka jaana batho ba sa tsise ka palo e e utlwalang.

E re le ntswa a sa bone thotloetso e e kalo, Rre Ratogomane ga a a nna fela ka jaana a leka go bapatsa tiro ya gagwe.

O ne a tseneletse ditshupo tsa Borwa Botlhaba kwa Tlokweng ka Motsheganong, go leka go bontsha setshaba tiro ya gagwe. BOKHUTLO

Source : BOPA

Author : Kelebogile Taolo

Location : RAMOTSWA

Event : Potsolotso

Date : Jul 11 Wed,2018

Networks

Social Network