Monday Jul 16,2018
Breaking News :
World Cup Begins
Home » News » Dikgang » Lenaneo la LIMID le thusitse monana go itshetsa

Lenaneo la LIMID le thusitse monana go itshetsa

E re ka puso e otlolotse letsogo go ntsha banana mo lehumeng ka mananeo, Rre Sakgothu Serame, yo o dingwaga tse di masome mabedi le bosupa, ga a a ipona tsapa go inaakanya le thuo ya dihutshane.
Mo potsolotsong le BOPA, a re e rile ka 2012, a sena go tsenelela dithuto puisanyo tsa lephata la temo-thuo tse di neng di ruta ka tsamaiso ya dihutshane, a tsiboga mme a gwetlhega go tsaya lenaneo la LIMID.
O tsweletse ka go re badiri ba temo-thuo mo kgaolong, ba ne ba mo kgothatsa thata go tsaya lenaneo, gape a sa lebale batsadi mo lwapeng, ka ba ne ba mo thusa ka digogi tse di dirisiwang mo temo-thuong.
O tlhalositse gore e rile ka 2014, a fiwa dipodi di le lesome le bobedi go simolola thuo.
A re le fa puso e se na go mo fa dipodi, o ne a bona go le botlhokwa go itokafatsa ka go reka dipodi tse dingwe go oketsa tse di teng.
O rotloeditse banana go etela diofisi tsa temo-thuo, go ya go botsolotsa ka mananeo.
A re ba seka ba kgobega marapo ka go utlwa bangwe banana ba re go dingalo go tsaya mananeo, a tlatsa ka gore dikgang di monate o di utlwa ka beng ba tsone.
 A re go netefatsa gore kgwebo ya gagwe e tswelela sentle e sa phutlhame, o silela batho letlhaka mme madi a teng o kgona go reka tse di tlhokegang, gape e bile o lema lablab go jesa loruo.
Rre Serame a re go itlhatlhelela ka tsa thuo ya dipodi, o kwatabolotse maele mo facebook.
O rile keletso ya gagwe ke go ipona a na le mehuta e e tlhabologileng jaaka bo Kalahari Red, e bile o batla go kabakanya itsholelo ka dikgwebo tse dingwe tsa temo-thuo, di tshwana le thuo ya dinotshi, dikoko le temo ya merogo.
A re gore a nne le dipoelo o rekisa dipodi mo bathong ba ba dirang meletlo ya manyalo le dintsho.
Rre Serame o tlhalositse gore kgwetlho tse a kopanang le tsone ke tlhaelo ya metsi le go swa ga tsone ka a ile a swelwa ke phoko.
A re ka jaana ga a a thapa ope ka madi a tsena ka bonya, gape o bone go le botoka go itlhokomelela loruo, ka podi e batla tlhokomelo e e tseneletseng.
Le fa go ntse jalo, Rre Serame o lebogetse ba lephata la temo-thuo go menagane go bo ba mo file dithuto tsamaiso thuo ya dihutshane, a sa lebale ba ofisi ya nyeletso lehuma.
O tsweletse ka gore ka puso e tlhaelelwa ke madi, o eletsa gore banaba ba ka thusa puso ka go ntsha seabe mo dikgetsing tsa bone go tshwara dithutopuisano, ka di le mosola.  BOKHUTLO

Source : BOPA

Author : Thusoyaone Sechele

Location : PHITSHANE MOLOPO

Event : Interview

Date : May 21 Mon,2018

Networks

Social Network