Monday Jul 16,2018
Breaking News :
World Cup Begins
Home » News » Dikgang » Emelang ditlhabololo ka dinao - Salakae

Emelang ditlhabololo ka dinao - Salakae

Mopalamente wa Ghanzi Bokone, Rre Noah Salakae o kopile banni ba Ghanzi go emela ditlhabololo tsa Motse wa bone ka dinao.

Mopalamente o ne a buisa phuthego ya kgotla kwa kgaolwaneng ya Morama mo toropong ya Ghanzi ka Mosupologo.

A re go botlhokwa gore ka ba komiti ya ditlhabololo tsa motse ba tshwaragane le makhanselara go dira ditlhabololo.

Mopalamente o boleletse banni gore go mo go bone gore P10 miillion wa dikgaolo tsa botlhopi yo o ntshiwang ngwaga le ngwaga gore o ka dirisiwa jang go tlhabolola matshelo a bone, e seng gore go dirwe ditlhabololo tse ba sa rerisiwang ka tsone.

Rre Salakae o kopile morafe go dira ditlhabololo tse di tlaa ba solegelang molemo.

Mopalamente a re le ene o ne a bona go le botlhokwa gore a tswe ka mogopolo wa go thusa bananyana ba ba gobeyang mo mebileng mme morago a tlhama lekgotlana la Shishana Trust.

A re ka jalo o tlaa tswelela a rerisana le morafe go utlwa gore a ba badumalana le lekgotla leo kana ga ba dumalane.

Mopalamente o ne gape a kopa banni ba Morama go tshwaragana le mapodisi go bona gore modumo o o sa robatseng banni ba Ghanzi wa ‘tlatsa lebala’ o o direlwang fa pele ga marekisetso a bojalwa a a mo

kgotleng ya Kabakae o ka emisiwa jang.

A re o ne a kopane le ramapodisi a Ghanzi ka kgang e, yo a mo tlhaloseditseng fa modumo oo o patilwe ke ditiragalo tse di maswe.

Rre Salakae a re banni ba Ghanzi ba tshwanetse go emela modumo oo ka dinao ka gore batho bao ba nna fela mo tseleng mo ba ka bakang dikotsi.

E rile banni ba akgela, ba dumalana le lekgotlana la Shishana, ba tlhalosa fa le le botlhokwa mo matshelong a batho ba kgaolo ya Ghanzi.

Ba boleletse mopalamente gore seemo sa banayana ba ba gobeyang mo mebileng ga se jese diwelang.

Baagi ba ne ba supa fa ba tsile go emela modumo wa ‘tlatsa lebala’ ka dinao go thusana le mapodisi.

Banni bao ba boleletse mopalamente gore modumo oo ga o ba robatse e bile batho ba nna fela mo tseleng, ka jalo go ka tsenya bakgweetsi ba ba dirisang tsela eo mo mathateng.

E rile modulasetilo wa komiti ya ditlhabololo wa kgaolwana eo, Rre Joseph Ndaba a ntsha pego ya gagwe, a tlhalosa fa ba dirisana sentle le mokhanselara fa ba dira ditlhabololo.

Rre Ndaba o ne a lela ka sekole se setona sa Ghanzi le sa Itekeng gore dikole tseo di makgasa di batla paakanyo e e tseneletseng.

A re fa o bona maduo a dikole tsa Ghanzi a wela tlase jaana a dirwa ke gore dikole tseo di makgasa.

E rile mopalamente a araba dilelo tsa bone a supa fa a le mo thulaganyong le ba kereke ya UCCSA go ya go baakanya sekole se setona sa Ghanzi, bogolo jang kwa matlong a boiteketso. BOKHUTLO

Source : BOPA

Author : Fredricah Nguahoka

Location : GHANZI

Event : phuthego ya kgotla

Date : May 17 Thu,2018

Networks

Social Network