Monday Jul 16,2018
Breaking News :
World Cup Begins
Home » News » Dikgang » Lekgotla la ditlhopho mo Bobirwa le ruta diphathi

Lekgotla la ditlhopho mo Bobirwa le ruta diphathi

Ba lekgotla  le le tsamaisang ditlhopho ba kgaolo ya Bobirwa ba gakolotse diphathi tsa sepolotiki ka go farologana go simolola go ipaakanyetsa ditlhopho tsa setshaba tse di tlaa tshwarwang ngwaga o o tlang.
Ba ntshitse kgakololo eo  mo bokopanong jwa bone le baemedi ba diphathi tsa sepolotiki ka go farologana ba kgaolo ya Bobirwa, ka Labobedi.


Mogolwane go tswa mo ofising e e tsamaisang ditlhopho, Rre Andrew Seutwetse o ne a gakolola baemedi ba diphathi go ya go rotloetsa batlhophi ba bone go ikwadisetsa ditlhopho mo ikwadisong e e tlang go simolola Lwetse e le malatsi a le mararo go tsena Ngwanatsele e le lesome le bongwe mono ngwaga 2018.


Rre Seutwetse a re ga go na go nna le ikwadiso ya tlaleletso, ka jalo go mo maruding a mongwe le mongwe go ititaya ka thupana go ikwadisa fa e bulelwa gore ba tle ba nne le sebaka sa go ya go latlhela tlhopho ya bone ka 2019.
O tlhalositse fa go tlaa dirisiwa matlhophelo  a a rurifaditsweng ka fa molaong.


A re se se botlhokwa ka nako ya tlhopho ke Omang yo o mo tirisong.
A re fa ba hira ba ba tlhophisang, ba tlaa tsaya batho ba ba mo kgaolong ka gore ba itse batho ba kgaolo eo.


Mogolwane wa lekalana la ofisi ya kwadiso dintsho le matsalo  kwa Bobonong, Rre Tshepho Gouwe a re diphetogo tse di teng ke gore boOmang ba ba ntseng ba sena letsatsi le kgwedi e le ngwaga fela ba nne dilo tseo.
O ne a tlhalosa fa thulaganyo eo e dira mosuke mo lekalaneng la kwadiso dintsho le matsalo.


Ntlha e nngwe ba leka ka bojotlhe go phepafatsa dibalamakgolo tsa bone.
Rre Gouwe a re kgwetlho e tona ke dipalo tsa boOmang ba ba sa tsewang ba le 60 000 mme ba le gaufi le go fela lefatshe ka bophara.


A re kgaolo ya Bobonong fela ba ba sa tsewang ba 4 727.


Ntlha e nngwe ke gore Omang fa ba mo ntshafatsa o nna sebaka sa dikgwedi tse thataro, go na le pele e ne e le dikgwedi tse di lesome le bongwe.


O rotloeditse morafe go tsaya boOmang ba bone ka ga ba kake ba dira sepe ba sena Omang.  BOKHUTLO

Source : BOPA

Author : Pauline Mothudi

Location : BOBONONG

Event : Bokopano

Date : Mar 08 Thu,2018

Networks

Social Network