Monday Jul 16,2018
Breaking News :
World Cup Begins
Home » News » Dikgang » Komiti ya ditlhabololo e dumelane go gweba ka ditena

Komiti ya ditlhabololo e dumelane go gweba ka ditena

Ba komiti ya ditlhabololo tsa motse wa Mookane mo kgaolong-potlana ya Mahalapye ba dumalane le mogopolo wa go dira ditena tse madi a tsone a tlaa dirisiwang go tlhabolola matlo a VDC.

Modulasetilo wa komiti ya ditlhabololo tsa motse, Rre Oagile Mofokeng, o boletse mo potsolotsong le BOPA gore tumalano eo, e dirilwe mo phuthegong e mo go yone komiti e neng e sekaseka ditiro tse di tlaa dirwang mo ngwageng wa madi wa 2018/2019 ka madi a a abelwang dikgaolo tsa botlhophi tsa bopalamente.
 

A  re maikaelelo a go simolola kgwebo ya go dira ditena ke tsela nngwe ya go batla madi a komiti e ka a dirisang go tlhabolola matlo a a hirisiwang ke badirelapuso ka go a tsenya motlakase le metsi gammogo le go shafatsa a magologolo.

Rre Mofokeng o tlhalosa fa mengwe ya megopolo e e dumalanweng e le wa go kopa setsha mo go ba lekgotlana la kabo ditsha mo Mahalapye se ba tlaa se dirisang go agela mapodisi matlo a boroko mo go sone.

Mabapi le dikgang tse dingwe, Rre Mofokeng o tlhalositse fa a itumelela go tsweledisiwa ga tiro ya go dirwa ga tsela e e tshwaraganyang Mookane le metse ya Dibete, Mmaphashalala, Dovedale, Makwate le

Machaneng e e ntseng e emisitswe go dirwa mo lebakeng le le ka tshwarang kgwedi.

A  re tsela eo, e e tlaa tshelwang sekontere, e ne ya emisiwa go dirwa ka nakwana morago ga gore ba komiti ya ditlhabololo tsa motse wa Leshibitse kwa kgaolong ya Kgatleng ba supe ngongorego ya gore ga ba a rerisiwa ka go dirwa ga tsela eo le ntswa e le bone ba neetsweng setlankana sa go dupa ditswammung mo tikologong eo. Bokhutlo

Source : BOPA

Author : Mojaboswa Jabeng

Location : MAHALAPYE

Event : potsolotso

Date : Mar 07 Wed,2018

Networks

Social Network