Sunday Jun 24,2018
Breaking News :
World Cup Begins
Home » News » Dikgang » Madirelo a tlhasetswe ke merwalela kwa Maun

Madirelo a tlhasetswe ke merwalela kwa Maun

Madirelo mangwe mo Maun a ne a bona go se gontle ka jaana bangwe ba ne ba fitlhela dikago di aperwe ke merwalela fa ba tla go theogela ka Labobedi mo mosong.

Merwalela eo e ne e bakilwe ke pula e e mashetla e e neng ya gosomana bosigo jwa Mosupologo mme ya ama madirelo ka bontsi le dikago dingwe tsa puso.

Badiri bangwe ba madirelo a a amegileng ba ne ba tlhola ba thinkgetse ba lwa le metsi ka jaana a ne a tsene le mo dikantorong tsa bone mme a emisa tiro ya letsatsi.

Mangwe a madirelo a a amegileng thata ke a Botshelo Guest House mme mo potsolosong bodiredi bo supile fa e le sa ntlha ba bona tiragalo eo.

Ba re e rile ba goroga mo mosong ba fitlhela metsi a thibile kwa kgorong a tswaletse le bone baeng ba bone mo dikagong, ba tlatsa ka go re le dikoloi tsa bone di ne di tibile mo metsing.

Mongwe wa bagolwane kwa madirelong ao, Mme Keloreng Samboyo o ne a bua a sa kgale mathe a re se ba se boneng ke sone sebetso sa tlholego, a supa fa merwalela eo e amile dikamore tsotlhe tsa baeng le yone ofisi tota.

A re ba fitlhetse sengwe le sengwe se se mo dikamoreng se kolobile mme a supa seemo seo se amile le yone kgwebo ka jaana baeng ba ne ba sa itumela gotlhelele.

A re ka seemo se ne se sa iketla ba ne ba kgona go buisanya le baeng ba bone gore ba fudugele kwa madirelong a mangwe a a sa amegang fa ba santse ba lwa le go busetsa seemo mo mannong.

Mme Samboyo a re ba amogetse go sa itumela ga baeng mme seemo se se diragetseng ga se kabomo ka jaana le bone ba ne ba sa se solofela.

A re bangwe ba ne ba batla gore ba busediwe madi mme ka molemo wa kagng e le go buiwa ba ne ba felela ba tlhaloganya gore moo ke sebetso sa tlholego.

O boletse fa ba patelesegile go thintsha maetoo otlhe a a neng a rulagantswe ka jaana go lebega ba tlaa tsaya nako go baakanya.

E re dikgang di eme jalo, dipula tseo di ne tsa baka kgaogo ya motlakase mo madirelong ka bontsi.

Go bapa le madirelo ao, go ofisi ya rakonteraka mongwe yo o thapilweng go atolosa madirelo mme le ene o supile fa a palestwe ke go tswelela le tiro ka jaana a hupeditswe ke metsi.

Rre yoo, yo o neng a sa batle leina la gagwe le ka umakwa, o tlhalositse fa metsi a tsene mo diofising tsotlhe mme a kolobetsa sengwe le sengwe se se mo teng.

A re seemo seo se ba garotse dipelo ka jaana e le sa ntlha ba se bona.

O boletse fa ba sepodisi ba ne ba patelesega go tla go tswala tsela e e fetang fa madirelong a bone ka jaana e ne e sa bonale e bile metsi ao a baya matshelo mo diphatseng. BOKHUTLO

Source : BOPA

Author : Esther Mmolai

Location : MAUN

Event : Potsolotso

Date : Mar 07 Wed,2018

Networks

Social Network