Wednesday Jun 20,2018
Breaking News :
World Cup Begins
Home » News » Dikgang » Ba Serowe ba lekodisa morafe ka go ipaakanyetsa loeto lwa ga Tautona

Ba Serowe ba lekodisa morafe ka go ipaakanyetsa loeto lwa ga Tautona

Motshwarelela bogosi jwa ga Mmangwato, Kgosi Sediegeng Kgamane a re e le ba bogosi, ba bone go le botlhokwa go bitsa morafe go lekodisana le go bona gore ba tsamaya fa kae ka dipaakanyo tsa moletlo wa tsamaya sentle wa ga Tautona Lt Gen. Dr Seretse Khama Ian Khama o o tlaa tshwarwang kwa Serowe Mopitlo a le 27. 

Kgosi Kgamane a re fela jaaka Tautona a tsamaya a laela kwa dikgaolong ka go farologana, le bone ba tshwanetse go supa gore Tautona ke kgosi kgolo ya bone le gore Serowe ke mo ga bone. 

O kopile morafe gore mongwe le mongwe a itshekatsheke gore o ya go laela Tautona jang ka e bile a re o itse gore bone e le Bangwato ga ba ke ba letlelela go gaisiwa ke metse e mengwe mme a re o na le tsholofelo ya gore ba tlaa dira sengwe. 

Kgosi o ne a kopa morafe gore o iteke thata go dira jaaka ba tlhola ba dira le gore ba dire ka lorato. 

A re go nna thona fa ba ka palelwa ka gore kgotla ya bone ke yone e tona mo dikgotleng tsotlhe tse di mo ga Mmangwato. 

E rile a ntsha la gagwe, Kgosi Mokhutshwane Sekgoma a rotloetsa morafe wa Bangwato gore letsatsi la go laela ga ga Tautona le na le dikgwetlho mme a ba kopa go bereka ba le seopo sengwe gore ba tle ba atlege. 

Kgosi Sekgoma o kopile dikgosana go nna ba le teng mo dikgotlaneng tsa bone gore batho ba itse gore ba isa dimpho kae go itsa ketsaetsego. 

O itsisitse morafe gore dikomiti di teng mme a ba kopa gore ba ithaope ba tsene mo dikomiting. 

Molaodi wa kgaolo-potlana ya Serowe, Rre Charles Modise a re morafe o ikopanye le lephata la temo-thuo go dira dithulaganyo tsa gore ba tsisa jang dimpho tsa leruo. 

Mongwe wa batsenelela bokopano joo, Mme Joyce Modisagape a re le bone e le ba mophato wa Malwelamotse wa batho ba ba tshotsweng ka ngwaga wa 1951 go ya kwa go 1955 o Tautona e leng leloko la one, ba tlaa kopa gore ba tle ba bone gore ba ka laela Tautona jang. BOKHUTLO

Source : BOPA

Author : Chendzimu Themba

Location : SEROWE

Event : Phuthego ya Kgotla

Date : Feb 08 Thu,2018

Networks

Social Network