Budget Speech QKJ
Monday Feb 19,2018
Breaking News :
Daily BOT50 celebration
Home » News » Dikgang » Mosadi o batlisiwa ba gagabo

Mosadi o batlisiwa ba gagabo

Mapodisi a Maun a mo patlong ya masika a mosadi mongwe yo o gobetseng mo tlhogong mme a felela a sa kgone go bua e bile a robaditswe kwa bookelong.

Fa a bua mo potsolotsong le BOPA, mothusa mookamela mapodisi a Nhabe, Superintendent John Kelebeng o tlhalositse fa kotsi eo e diragetse Tlhakole a tlhola gabedi fa borogong jwa Shashe mo Maun.

Supt. Kelebeng a re mme yoo o ne a thulwa ke khombi e e rwalang bana ba sekole mme a isiwa kwa kokelong ya Letsholathebe mo Maun mme morago a isiwa kwa Nyangabwe kwa Francistown.

A re sebe sa phiri ke gore mme yoo ga a bue e bile o ne a sa tshwara dipampiri tse di supang gore ke mang.

Supt. Kelebeng o ne gape a re ba ba neng ba le fa tiragalong ya kotsi le bone ba ne ba sa itse mme yoo, ka jalo a re ga go itsewe gore ke mang le gore o tswa kae, le tsone dingwaga tsa gagwe tota ga di itsewe.

Ka jalo mapodisi ba mo patlong ya ba ba ka tswang ba sikana le mme yoo.

Go ntse go le foo, Supt. Kelebeng o tlhalositse fa mapodisi a tlhotlhomisa tiragalo ya go tlhaselwa ga bapagami ba mokoro ke kubu kwa Shakawe.

A re borre ba babedi ba ba neng ba pagame mokoro wa legong mo nokeng ya Okavango ba ne ba tlhaselwa ke kubu mme monna wa dingwaga tse di masome mararo o ne a robega maoto otlhe kgwedi ya Tlhakole e tlhola gabedi mme a tlhokafala kwa kokelong ya Gumare letsatsi le le latelang.

Supt. Kelebeng o supile fa monna yo mongwe a sa bona dikgobalo mo kotsing eo.

O bile a ikuela kgatlhanong le dipego tsa batho ba ba sa bonweng mo Maun, bogolo jang bana ba bannye tse a reng bontsi jwa tsone ke boitaolo jwa bana ka ba felela ba boela malwapeng, selo se a reng go supa fa e le go tlhoka kgalemo ya batsadi.

O supile fa ba nnile le dikgang tse pedi tsa bana ba dingwaga tse di ferang bongwe le yo o lesome ba ba neng ba begilwe ba sa bonwe mme ba ipusetsa magabone. ENDS

Source : BOPA

Author : Kedirebofe Pelontle

Location : MAUN

Event : Potsolotso

Date : Feb 07 Wed,2018

Networks

Social Network