QKJ passing
Wednesday Jan 24,2018
Breaking News :
Daily BOT50 celebration
Home » News » Dikgang » Monna o tshoseditse lepodisi kwa Díkar

Monna o tshoseditse lepodisi kwa Díkar

 Ramapodisi wa kgaolo ya Ghanzi, Rre Modiro Lekone a re ba tlhotlhomisa tiragalo e mo go yone monna mongwe wa D’kar a tshoseditseng mme wa lepodisi ka thipana.


Rre Lekone o buile mo potsolosong le BOPA, a re e ne ya re ka di 28 tsa Sedimonthole mo mosong ka nako ya lesome monna mongwe wa D’kar wa dingwaga tse di fa gare a gatlhamela mo ofising ya sepodisi ya D’kar a tshotse thipana a supa fa a batla go bolaya lepodisi. A re batho ba ba neng ba le fa ofising ya sepodisi ba akaretsa mokhanselara ba kile ba leka go kgalemela monna yoo mme ga retela ba bo ba felela ba kopa thuso mo mapodising a Ghanzi ba ba ileng ba kgona go tshwara monna yoo. A re monna yoo o ne go lebega a nole phetelela.


Rre Lekone a re ba tshegeditse monna yoo ka ditlhothomiso tsa sepodisi di santse  di tsweletse.
 Mo go tse dingwe Rre Lekone a re ba tsweletse ka go kwadisa dikgang tsa dititeo.


A re  mo mosong wa di 29 tsa Sedimonthole ba kwadisitse kgang e mo go yone mme mongwe wa dingwaga tse di masome a mane le bone wa kgotlana ya Khurakhura mo Ghanzi a ketekilweng ke rre yo a nnang le ene mme a mo gobatsa ka sengwe se go belaesegang e le thobane.
Mme yoo o santse a le kwa sepateleng go bona thuso.


A re bobedi jo bo ne jwa tlhoka kutlwisisanyo bosigo mme ntwa ya tlhagoga.
Rre Lekone a re ba sepodisi ba santse ba le mo motlhaleng wa monna yoo ka e rile a sena go dira molato o a inaya naga.


Rre Lekone o kopile banni ba kgaolo ya Ghanzi go fokotsa tiriso ya nno-tagi mme ba itumelele malatsi a ngwaga o mosha ka boikarabelo.
A re e le ba sepodisi ba tswelela ba le teng go thusa Batswana.


A re ba tlaa bonala ka dinako tsotlhe mo motseng le mo ditseleng. BOKHUTLO

Source : BOPA

Author : Lemogang Madumane

Location : GHANZI

Event : POTSOLOTSO

Date : Jan 03 Wed,2018

Networks

Social Network