QKJ passing
Wednesday Jan 24,2018
Breaking News :
Daily BOT50 celebration
Home » News » Dikgang » Mapodisi a malala a laotswe

Mapodisi a malala a laotswe

Ba sepodisi sa Botswana mo dikgaolong tsa Shoshong, Mahalapye, Machaneng, Martins-drift le Dibete ba tsweletse ka go ipaakanyetsa malatsi a boitapoloso a ngwaga o mosha ka go dira dikganedi mo ditseleng.
Motshwarelela mogolwane wa mapodisi a District No. 16 Superintendent Morris Kwena a re ba setse ba simolotse go tlhoma dikganedi kwa Dibete, Pallaroad le Ikongwe e bile a bolela fa ba tlaa bo ba ipapanne sentle kwa melelwaneng ya Martins-drift le Parshalt ka malatsi ao.


Superintendent Kwena o boletse fa ditlhopha tse dingwe tsa mapodisi di tla bo di itebagantse le go tsamaya metse le metsana go tshwara  ba ba tlaa rekisang majalwa pele ga dinako tse di beilweng gammogo le ba ba amogang batho dithoto.
A re o ikuela mo bakgweetsing ba ba dirisang ditsela tsa Serowe/Molepolole, Mahalapye/Shoshong, Mahalapye/Machaneng le mo tseleng ya A1 e e tshwaraganyang dikgaolo tsa borwa le bokone go kgweetsa ka kelotlhoko ka jaana ditsela tseo di saila loruo, segolo jang bosigo.


Rre Kwena o tsweletse ka go kopa barui go ntsha dikgomo mo ditseleng tse di ageletsweng go hema dikotsi tse di ka bakwang ke loruo.
A  re beng ba dikgomo tse di tlaa bakang dikotsi mo ditseleng tseo ba tlaa di gama ba sa di tlhapela.


Fa dikgang di eme jalo, mogolwane wa lephata la tsa mesepele, boagedi le dipasa kwa Serowe, Rre Joel Heii, o bolela fa dipalo tsa batho ba ba tswang le go tsena mo Botswana kwa kgorong ya molelwane ya Martins-drift jaanong di tlhatlogetse kwa godimo fa go tshwantshanngwa le malatsi a a fetileng.
Rre Heii o rile ka ntlha ya go oketsega ga dipalo tsa batho kwa molelwaneng oo, ba tsere tshwetso ya go oketsa dipalo tsa bodiredi, mme a bolela fa dinako tsa go bulwa le go tswalwa ga molelwane di tlaa tswelela jaaka gale. BOKHUTLHO

Source : BOPA

Author : BOPA

Location : MAHALAPYE

Event : POTSOLOTSO

Date : Dec 28 Thu,2017

Networks

Social Network