QKJ passing
Saturday Aug 19,2017
Breaking News :
Daily BOT50 celebration
Home » News » Dikgang » Phuthego ya ga Keresete e thusa go busetsa bana sekoleng

Phuthego ya ga Keresete e thusa go busetsa bana sekoleng

Motshwarelela mogokgo wa sekole se sebotlana sa Dutlwe, Mme Banyana Kepuyamore o kaile fa go abela ba ba tlhokileng lesego mo botshelong, bogolo jang bana e le sesupo sa lorato e bile go ba fa tsholofelo.

Mme Kepuyamore o tlhalositse jaana fa a ne a amogela baeng kwa sekoleng sa gagwe jaaka kereke ya Phuthego ya ga Keresete kwa Dutlwe e ne e abela bana ba sekole seo paka ya sekole le didirisiwa tsa metshameko ka Labotlhano.

Mme Kepuyamore o tlhalositse fa go otlolola letsogo ga Phuthego ya ga Keresete go tlaa tsisa tekatekanyo mo baneng e bile go tlaa fa bana ba ba neng ba sa tsene sekole sebaka sa go tsena sekole sentle go sena sekgoreletsi.

Moemedi wa kereke eo, Rre Jeffrey Tsheboyagae o ne a supa fa ba bone go le botlhokwa gore ba abele bana ba sekole seo paka ya sekole gore le bone ba seka ba farologana le ba bangwe, le go ba itsa go itseela kwa tlase mme ba tloge ba tshabe sekole.

O ne a tlatsa ka go supa fa  ba tshwentswe ke go bona bana ba sekole seo ba tlogela sekole ka mmetela,  mme a kaya fa e le ba kereke ba bone go le maleba go inaakanya le mokgatlho wa sekole seo o o itsegeng ka leina la Circles of Support go phutha bana kwa merakeng le go ba ntsha kwa masimo go ba busetsa kwa sekoleng.

O ne a supa fa maitlamo a bone e le go ruta le go bontsha bana mosola wa thuto ka ba sa batle go ba bona ba tletse mo mekgwatheng go sena se ba se dirang.  

A re e le kereke ba ka itumelela go bona bana ba rutegile e bile ba kgona go tlhokomela malwapa, mme ka jalo a kopa batsadi go emisa go tlogedisa bana sekole.

Rre Tsheboyagae o ne a supa fa ba ne ba ntsha bana ba supa mo mokgwatheng mme ba ba isa sekoleng, a supa fa bangwe ba bone ba setse ba tsena kwa sekoleng se segolwane.

A re se se supa fa maiteko a bone e le kereke a setse a na le motlhala, mme a supa gape fa ba duelela bana ba le bararo ba ba tlhokileng lesego sekole se sebotlana.

E rile a ntsha mafoko a tebogo, kgosana ya kgotlana ya Mokubiswa, Rre Takaseme Mokubiswa o ne a lebogela kereke go bo e bonye botlhokwa jwa go thusa le go aga bokamoso jwa baithuti gore e tle e nne babusi ba ba nonofileng ba kamoso.

O ne a kaya gape fa kereke e abetse bana paka ya sekole ka nako e e siameng ya mariga mme a rotloetsa bana gore ba tlhoafalele thuto gore ba seka ba tla go felela ba tshwana le batsadi ba bone ka bogologolo ba ne ba sa itse mosola wa thuto go na le dinako tsa gompieno mo sengwe le sengwe se batlang motho a iteilwe seatla. BOPA

Source : BOPA

Author : Boago Gaoatswe

Location : Letlhakeng

Event : Kabo dimpho

Date : Jun 19 Mon,2017

Networks

Social Network