Tuesday May 22,2018
Breaking News :
Home » News » Dikgang » Domkrag e lebogela tlhopho

Domkrag e lebogela tlhopho

 

Mopalamente wa kgaolo ya Molepolole bokone e bile e le mothusa tona wa botsogo Rre Gaotlhaetse Matlhabaphiri o kopile maloko a phathi e e busang ya Botswana Democratic Party go itsosolosa, go tsosolosa dikomiti mmogo le go okela maloko a masha mo phathing.

Rre Matlhabaphiri o ne a bua bosheng jaaka a ne a le sebui segolo mo moletlong wa go ipelela phenyo ya ditlhopho ga mokhanselara wa Botlhapatlou e le wa phathi ya BDP, Rre Lefoko Kegopotswe kwa motseng oo.

A re go okelwe maloko a masha mo BDP mmogo le gone go itsosolosa go netefatsa gore mo ditlhophong tse di tlang tsa ngwaga wa 2014, puso e boela gape mo diatleng tsa ga Domkraga e e tsweletseng ka go itshupa fa e na le bokgoni le boikarabelo jwa go tswelela e direla Batswana.

A re Batswana ba tshwanetse ba lemoga fa diphathi tsa kganetso di tlhaela bokgoni jwa go busa ka jaana di tshabelelwa ke go thubega bobe, ka jalo seo se supa fa go ise go nne le phathi epe e e ka bapang le BDP ka go busa.

Rre Matlhabaphiri o tlhalositse fa BDP e itse ka botlalo ka dikgwetlho tse di lebaneng tshaba ya lefatshe leno, mme ke sone se e sa ntseng e kgona go itataisa mme gape e tsweletse ka go tlhamela Batswana mananeo a go ka intsha mo lehumeng.

Mongwe wa maloko a BDP mo kgaolong Rre Keimetswe Keokopile o galaleditse mokhanselara Kegopotswe a bolela fa a ba leretse mananeo a tshwana le la SHHA, a ba neng ba ntse ba a utlwalela fela kwa metseng e sele ga mmogo le gone go ba rotloetsa go a tsenelela.

A re ditiro tsa gagwe di a bonala fa e sale a tsaya kgaolo, mme e bile o diragaditse ditsholofetso tsa gagwe, ka jalo a kopa batlhophi ba kgaolo eo go ya go tswelela ba mo tlhopha le mo ditlhophong tse di tlang go ya go tswelela a ba direla.

 E ne ya re kwa bofelong ga amogelwa maloko a robabongwe go tswa kwa phathing ya Botswana National Front. ENDS 

Source : BOPA

Author : Lillian Peloentle

Location : LETLHAKENG

Event : Moletlo wa ipelelo phenyo

Date : Dec 20 Thu,2012

Networks

Social Network